家賊難防，馱走屋樑(客語文集)

台灣民調泛濫，又輒常暗含政治操作，一方面挾民意攻擊敵對陣營，一方面順便為自家陣營造勢。這「民」到底係麼介色彩之民？無先分清楚，或者故意混淆，終究以偏概全，失真失德！

故所一邊講，自家介民調係顯現民主聲音，另一邊批評佢係搞弄民粹。

「假民調」得人驚介陰謀佇後背，佢打扮成「全民共識」，製作成蓋像無形飛彈樣仔，堂堂皇皇穿心入耳，受傷介人事痛到欲死，想求救乜發無出聲。

這係台灣亂源之一，在台灣泛藍媒体佔大部份，這兜共色媒体共同做民調發聲，斷真驚天動地，造成人心不安。近年來佢等做介民調顯示台灣政經沉淪，台灣精英走淨淨，唯有大步西進，台灣正能得救，事實敢係恁樣？

近年來台灣人失忒泰半自信心，一大部原因係分這兜假民調影響到，做假民調者形同家賊，客家古老言：「 家賊難防，馱走屋樑」，講介就係這種危機，台灣人應當冷靜下來，對抗這種無曰無夜，天羅地網矇騙介假民調，遽遽恢復台灣人，像擔竿樣介強韌生命力！

●守護台灣家園

轉去南部鄉下老屋家，發現莊肚鄉親感嘆：新頭路真壞尋，頭擺做等好好介工廠，一下間蓋像發夢樣仔，毋知徙去奈位。聽講像牛賽壢樣，全徙去大陸哩喲！

莊肚介後生，有兜勉強尋到頭路，毋過月俸微薄，佢等又失忒傳統勤儉傳統精神，故所根本就毋罅用，寅食卯糧之下，祇好毋顧將來風險，刷現金卡來補貼，落尾都變成卡奴，老阿爸不時收到法院通知繳錢信，火氣大著，續毋知愛仰般來罵起。

以上係現時發生在南部鄉村介經濟情況縮影，其根源來自鄉村傳統產業不敵大陸磁吸效應，造成大量外移，頭擺在鄉村愛做毋驚無頭路，現下係煞猛無定著尋有頭路。有鄉親講：下二擺這兜後生無成要過大陸尋頭路係麼？真尷尬哪，這同我等開台祖無係行相反介路麼？

愐起台海兩岸政經政策，適「戒急用忍」到「有效管理」再到「積極管理」似乎並沒法度改變台灣政經大箍（領導者）親中傾中趨勢，台灣雖然財源滾滾大部份都滾去對岸。最近經續會提及「包機直航常態化」、「放寬赴中國投資四十％上限」及「本國銀行登陸」等開放政策，係毋係我等自家大憨牯樣開一條「青藏鐵路」，加速將台灣政經利益輸送到對岸？假使恁樣，台灣本土主體意識將畀稀釋殆盡，大中國巨龍意識在台灣翻起大風大浪，老鄉親介擔憂會盡遽成真：下二擺這兜後生無成要過大陸尋頭路，係麼？

●將心比心

管家阿卿嫂，分人惡意亂罵係台灣垃圾，又被執疑佢係無係有買台開股票賺錢。到尾，阿卿嫂在大批媒体記者前，忍無可忍盡譴反駁：「我做這工作祇不過係換一包薪水，並無做違法事情，汝等做毋得亂糝抹黑我！」

是非恁清楚，假使我在一間公司食頭路，公司頭家做出違法亂紀之事，我無成做得分人講，我同佢同流合污？
阿卿嫂對有藝人，在搞笑節目中模仿佢也盡毋認同。這係台灣民主開放異象，名人分藝人拿來隨便搞笑由來已久，觀眾看到笑哈哈，當事人心頭可能苦哈哈，假使當事人有被羞辱感覺，這種「幽默」就有必要檢討改善，應當避免搞笑成「高山頂項捉湖鰍，無影無跡講到有」，忒過份全民甚至要加入譴責正著（才對 ）。

以上該兜道德上介失誤，都係源自政治上介紛爭，造成台灣人道德感錯亂。汝同我之間，做得政治立場無相同，這係做得公開辯論。毋過是非觀念做毋得混淆，假使混淆，社會安定定著無法度維持，這係最得人驚介社會現象，甚至比政治上介紛爭還過可怕。希望大家將心比心，汝今晡日仰般（怎樣）對待別儕，天光日別儕就會用同樣方式來對待汝。

●清廉保台

泛綠陣營既經講蓋明白，假使第一家庭涉弊案，請依法辦理，就算阿扁總統涉案也不包庇寬容。無過泛藍陣營還毋放過，用舖天蓋地「清廉保台」符誥窮追猛打，甚至二實八虛像編故事演肥皂劇，唯一目的就係，要將無明確違法證據介阿扁總統揙下台。這種黑白是非混淆做法，引起社會人心迷亂互相猜忌，以致藍綠緊行緊遠，
共樣介事兩種立場，愛之欲其生，恨之欲其死，信者恆信不信者恆不信。現今有兜政客媒體，更演變成失人性仇恨心態：像以嘲諷方式替陳幸妤新生兒命名，又以骷髏圖戲謔扁嫂暴瘦圓身。這對將來台灣社會和諧係盡毋好影響。

實在講清廉保台之說，既經分人﹝巳經給人﹞認定係政黨惡鬥，大聲要求別人清廉，故意忽視自家清廉，根本就係詛咒分別人死。愐起連戰兩千零四年競選總統政見，公開承諾要將適人民、日產、國家介黨產，還分國家同人民，結果總統無當選，黨產也無還。馬主席上台後，毋聲毋說黨產遽遽出脫，最近政府加強討還這兜全民
財產，國民黨拗蠻講「去告啊！」這種有嘴講別人無嘴講自家，死豬毋驚滾水熝介作風，愛仰般來服人？要知得這毋單淨係﹝不祇是﹞法律事件，也係有關國家人民介政治事件，到選舉時節，台灣人民定著要分佢付出無法估算介政治代價！

再講到「保台」，泛藍用「凱子軍購」「美國應當無條件提供軍火保台」介歪理硬拗阻擋，分國際社會誤認台灣連自保意願都無，淨想無付出任何代價就想分別儕來保護。恁仰﹝如此﹞思維之下，台灣要仰般﹝如何﹞做一個主權獨立國家？仰般大大方方行入國際社會？

●藍綠同根生

一個老婦人家，在南部電台叩應節目中講，佢愛拿钁頭（鋤頭）柄去嗆馬，分馬英九好看！一下間全台流竄「刺馬」得人驚消息，風聲鶴唳草木皆兵，馬英九到泛藍群眾聚會場合，一二千名警力層層保護，恁大介陣仗，分人批評比老蔣總統出巡還過威風，愐來（匪夷所思）實在時空倒退，分人（讓人）啼笑皆非感覺！

這幾日傳出，有 一個安做（自稱）「外省幫副座」軍人在網路項留言要「血洗總統府」，擺明愛分阿扁總統好看！一個年輕力壯軍人同一個年老力衰婦人家介言論威脅，麼儕（誰）較大？奇怪介係媒体報導雲淡風清，想用「情緒發洩」「言論自由」合理化解釋，不了了之。同樣介事情仰會差恁多？本土人士大感不平：台灣人介
命較無價值麼？

台灣上空原來籠罩著不平烏雲，恁樣（這樣）會更加烏雲密佈麼？

還有這擺（這次）在泛藍主導下，卸任正副總統禮遇條例三讀通過實施後，李登輝前總統月退俸適（從）現行四十一萬縮成廿五萬元，連戰領取政務官退職酬勞金同享有十八％優存待遇，無受到新制度影響，共樣做得（同樣可以）支領四十七萬元月退俸，這分人感到藍綠有別私心自用，嚴以律人寬以待己，分人（讓人）聯想「田螺理嘴飽，毋知自家勢窟生溜苔」感觸，無盡到公平正義普世價值。

無成（難道）政治立場分藍綠，公理是非也分藍綠？藍綠共下（一起）生活在台灣這片土地上，本係同根生，相煎何太急？故所台灣全民想愛和解共生，飲和平藍海咖啡，請適（從）無分藍綠一視同仁開始做起！

●大家都係輸家

媒体一連串爆料揭弊，無曰無夜轟炸之下，台灣社會蓋像逐日增溫介日頭，大家變著越來越煩躁不安。到裡尾（最後）延燒到罷免時，泛綠人士巳經按奈不住，隱忍二三年介憤怒像火山爆發咧，對抗氣氛在南台灣盡遽（迅速）燒起來，山雨欲來風滿樓，眼看一場流血衝突就欲一觸即發。好在各方呯籲泠靜，加上警方投入大警力嚴防暴動，正無（才未）造成台灣災難。

想起豪雨成災當時，政客發動群眾行上凱達格蘭，佢等講落大雨算麼介（算什麼），就係落刀子或者土石流淹到凱達格蘭，佢等也要堅持上街頭抗爭。有弊案就法辦，拖棚變政爭，實在無必要，真係不知民生疾苦啊。

清廉保台，人人讚成，無故用自私立場曲解，衹想達到自家政黨利益，就會分人看破手腳啊。假使在野黨祇想搞垮執政黨，好為將來選情鋪路，無分（不讓）民生法案通過，恁樣做（這樣做）執政黨固然無好政績，其實在野黨激起民怨，也得無到好處。這擺（這次）罷免案無過，馬英九支持度大幅下降，就係明證。

在街頭對決介場面，看著白頭那毛（白髮）老人家混雜人群，分大日頭晒到面秋紅汗濕身，真分人毋盼得（真讓人心生不忍），孰令致之？一場抗爭大家都係輸家！